FemTech-билдатон Алматыда: әйел денсаулығына арналған ЖИ-шешімдер жасалады

15 қарашада Алматыда Women Who AI Buildathon × Lovable бір күндік шарасы өтеді. Оған 250-ге жуық адам жиналып, әйел денсаулығына қатысты мәселелерді ЖИ көмегімен шешетін технологиялық өнімдердің прототиптерін әзірлейді. Шара Нархоз университетінде ұйымдастырылады. Ұйымдастырушылар оны Қазақстандағы алғашқы FemTech-билдатон деп атайды.

Бұл туралы techinfo.kz порталы Digital Business сайтына сілтеме жасап хабарлайды.

FemTech-билдатонның бағдарламасы

FemTech – әйел денсаулығымен байланысты технологиялар бағыты: оған мобильді қосымшалар, цифрлық сервистер, медициналық құрылғылар мен зерттеу құралдары жатады. Қатысушылар осы саладағы нақты бір мәселені таңдап, шешім ұсынуы және жұмыс істейтін прототипті қазылар алқасына көрсетуі керек.

Күн үш практикалық шеберлік сабағынан басталады. Femtech Force негізін қалаушы Ира Евдокимова онлайн форматта әйел денсаулығы саласындағы деректер туралы айтады, бір сабақ Lovable платформасына арналған, тағы біреуін DroneTech командасы өткізеді. Одан кейін командалар тәлімгерлердің қолдауымен әзірлеуге кіріседі. Жеңімпаздарға арналған ақшалай жүлде қоры – 1 000 доллар.

Қатысу шарттары

• оқушы қыздар, студент қыздар, зерттеушілер, жаңадан бастаған IT-мамандар мен технологиялық жобалардың негізін қалаушылар шақырылады;
• командада бес адамға дейін болады, олардың кемінде жартысы – әйелдер;
• өзімен бірге ноутбук алып келу қажет;
• команда атынан өтінімді капитан береді.

Ұйымдастырушылар YRI Fellowship зерттеу бағдарламасымен серіктестік туралы да хабарлады: қатысушыларға осы бағдарламадағы оқу ақысын ішінара төлеуге 1 500 доллар стипендия уәде етілген. Шара 08:30-дан 17:30-ға дейін жалғасады, ашылуы 09:30-ға белгіленген.